و بدأ الحياة بجد

السلام عليكم

اخيرا خلصت امتحانات و اتخرجت زي ما كان نفسي اتخرج و اخلص

و بدأت مرحلة جديدة في حياتي ... جديدة خالص

الحياة الجد .. الواقع .. الحياة العملية .. سوق العمل .. المستقبل .. الرجولة .. تحقيق الذات

كلها كلمات ترمز لمرحلة واحدة مرحلة مابعد التخرج

ولاني كنت متشوق كل الشوق للمرحلة ده لاني مخطط لها كتيير قوي و بانتظرها بفارغ الصبر

فحاولت كل المستحيل اني اكون اول من يدخل المرحلة و بقوة و بأصعب ما يمكن قبل اي حد من اصحابي او زمايلي

و باصعب ما يمكن

فنزلت قدمت تدريب في شركة كبيرة زي شركة ميديا انترناشيونال

و في مشروع زي اسلام اون لاين

و الحمد لله دخلت اول مقابلتين الحمد لله

واجهت صعوبات بس الحمد لله ماشي في طريق فيه شوك و ورد فيه شمس و مطر

زي ما فيه صعوبات و تحديات زي ما فيه ناس تساعدك و توقف جنبك في كل مكان و في وقت

كل ما توقف قدامي صعوبة او مشكلة او موقف صعب او او او .... الاقي واحد اما اخ حبيب اما صديق وفي اما جار ثقة و اما زميل مخلص بيخدمني قد ما يقدر يستطيع يخدمني

و الحمد لله بجد ربنا اكرمني باخوة احباب مخلصين و اصدقاء و جيرة طيبة و زملاء فوق الوصف

نبدأ بالتريب الزمني للأحداث :
-بس أأكد لك اني هحاول اكتب بطريقة اي حد يقرا يستفيد مما سأكتبه في حياته و ليس مجرد مذكرات او يوميات-

اتصلت بالشركة لتحديد ميعاد للمقابلة و تم تحديدها و ذهبت للمقابلة

بس كل ده في يومين بس بعد امتحاناتي مباشرة
- قبل ما تتصل باي حد ظبط امورك الاول ..
1- السي في السيرة الذاتية بتاعتك لازم تبقي جاهزة و متظبطة و متراجعة كويس من اصدقائك و ناس فاهمه و متخصصة
اطبع كذا نسخة من السي في اكثر من اربع نسخ ولو معاك فلوس او صورتك في الورق اطبع الوان

2- اسطوانة اعمالك .. جهزها قبلها بفترة كافية بيوم او اكتر من يوم و اهتم بيها كويس و ركز علي وجود شغل في نفس التخصص اللي انت مقدم فيه ... و ركز كويس علي اهم نقطة

اوعي اوعي تعمل زيي و تنسي الاسطوانة في البيت و انت نازل رايح المقابلة

و اعمل اكتر من نسخة من شغلك ده او الاسطوانة معاك نسختين او تلاته

و نسخة علي الفلاشة معاك كمان >> و ده اللي انا عملته و الحمد لله انقذتني

>> تأكد ان الفلاشة مش فيها اي فيروسات مش زي فلاشتي كانت مليانه فيروس غبي كنت مكسوف و المدير بيشوفها
و اعتذرت جامد باحراج شديد علي كده .. و حاول الفلاشة تبقي فاضية الا من شغلك بس

ولو تقدر تحط نسخة علي السيرفر عند اي حد من اصحابك حطها برده
>>> لو ليك نماذج شغل اون لاين تأكد من السيرفر بيشتغل كويس قبل ما تنزل و اوعي الهوست بتاعك يحصل فيه اي ابديت لاي سبب

3- مستعد نفسيا كويس
.4- مستعد ماديا لاي تكاليف قد تطلب منك

بس ده الحاجات اللي انا ما عملتهاش و بنصح نفسي و بنصحكم تنتبهوا ليها

في المقابلة حاول تبقي علي طبيعتك قدر الامكان

حاول ما تتكلمشي كتيير

سيب فرصة للي قدامك يسألك و تجاوب اجابة مختصرة

و حاول تتابع كل حاجة حواليك ولو جزئية صغيرة .. فراقب قبل ان تراقب ..

لمع الجزمة كويس .. لو عرفت تغسل وشك كويس قبل ما تدخل يبقي كويس خصوصا لو جاي من سفر

دوّر علي اي مراية و بص فيها كويس و كلم نفسك بكلام ايجابي جامد تشجيعي و تسخيني


لو مقابلة مش رسمية .. بص في عين المدير كويس و هو بيسألك عادي .. ولو سلم بحرارة سلم عليه بحرارة

و لاحظت ان اللي يهم المدير مستواك التقني او في التخصص مش مهاراتك الاجتماعية

اللي يهمه بقي مهاراتك الاجتماعية و الشخصية هو مدير الموارد البشرية او شئون العاملين او HR Manager

اللي امتحني في الشركة مهندس عمر .. شخصية بجد ممتازة قوي .. عجبتني قوي

و شرف كبير لي انه يبقي المشرف عليّ في التدريب يارب في الفترة الجاية

و انا ماشي من اول مقابلة طلبوا مني ابلاغهم بمسألة سكني في مصر و بامكانية احضاري لاب توب معي في التدريب

كنت ساعتها مبسوط من المقابلة و من الشركة فماركزتش علي صعوبة الطلب فقلت بسيطة سهلة كنت متفائل جدا ساعتها

بس اول ما روحت و تاني يوم بحاول اظبط اموري

1- السكن ؟؟ يالهوي اعمل ايه في السكن و اسكن في القاهرة ولا اكتوبر .. طب هجيب منين سكن و تكاليف السكن
و كأني كنت بلا وعي و المدير بيكلمني في النقطة ده
اتغميت و اتخنقت و اضايقت جدا

بس لما رجعت تاني بصيت للموضوع بتفائل و ايجابية و ببببببسااااااااااااااااااااطة زي ما محمد غنيم بيحاول يفكرني ببساطة التفكير في حل المشكلات .. ربنا يكرمه يارب

تم حل مشكلة السكن الحمد لله و انا استقريت فيه امبارح و هو حلو قوي

2- اللاب توب .. اجيبه منين و ازاي ؟
أأجر ؟ و بكام ؟ و منين ؟ >>>>>>>>>>>>> هو فيه لاب توبات بتتأجر اصلا ياعم سيد فتحي ؟ اكسباير للفكرة ده
اشتري لاب توب ؟ مممم الميزاينة خربانة اجيب منين ؟ لقيت اسعار التقسيط نار و الكاش نار علي الاقل نار بالنسبة ليّ ؟؟
و انا ما اشتريتش لاب توب قبل كده و مش عارف اشتري ازاي و مش عارف مواصفات اللاب الكويس ايه :(
استلف ؟ ممم
حطيت لستة من اصحابي اللي ممكن استلف منهم و الحمد لله بجد انا ما كنتش اتخيل ان تعاملهم مع الموقف كان كده
صديق : حاول يتصرف لي في لاب توب بس اعتذر .. بس ربنا يكرمه حاول
و زميل : حاول بس اخوه كان محتاجه .. بس بجد ربنا يكرمه
و صديق : قال لي اللاب توب موجود بس لازم اسافر مدينة نصر اخده لانه بيذاكر و عنده امتحان بكره

بس الحمد لله المشكلتين دول اتحلوا او شبه اتحلوا و الهم انزاح

و كانت اصعب مهمة اني اجهز الشنطة و انا مسافر

لاني مش بحب اسافر و بعدين اكتشف نسيت حاجة مهمة او محتاج حاجة مش معايا :(

بس اختي ساعدتني في ترتيب الشنطة كاملة

<<<< تنبيه : حاول تقلل من الحاجات اللي هتاخدها معاك في السفر ما تعملشي زيي

3 شنط كاملة هندباج كبيرة للهدوم و شنطة ظهر للجزمة و الكتب .. و شنطة كتف للورق و الهارد و الاكل

يالهوي اخر بهدلة في المواصلات .. التلات شنط بهدلوني و انا قاعد في المترو و انا راكب مواصلات

اوعي حد نفس غلطتي و بعد ما ترتب الشنطة شوف اهمية كل حاجة في الشنطة

و بعدين الحمد لله نزلت الصبح بدري و ووصلت الشركة بدري 5 دقايق و المواصلات كانت حلوة و سهلة

ووصلت الشركة .. الاقي مش معايا تليفون مدير الموارد البشرية ..

يبقي نقطة تانية مهمة : لما حد يبعت لك نمرة موبايله في ايميل رسمي حاول تسجله عندك يمكن تحتاجه خصوصا لما يكون مدير هيمتحنك كمان شوية

و امتحنت امتحان زي الفل في المهارات الشخصية و الاجتماعية

لا لا ياشباب كان تحقيق في كل سيرتي الاجتماعية و في كل اللي عملته في المجتمع و في حياتي

و هل لو كان لي اي افكارمبتكرة اتنفذت ؟ او لي افكار مبتكرة بس ما اتنفذت ايه هي ؟

بس كان كان اول الامتحان كان صعب في انه قاللي
speak about yourself
طبعا بالعنجليزي ؟ يالهوي يالهوي .. بلعت ريقي قلت له احم احم ممممم
قلت شوية حاجات جت علي بالي من السي في بتاعتي بالانجليش بس حسيت اي لبخت و ما قدرتش اكمل غير بالعافية

بس سألني كام سؤال تاني بالانجليش بس ما حاول جاوب عليهم

و بقية المقابلة كانت بالعربي ..

بس حاسس اني اتكلمت كتيير فيها علي كل سؤال .. مش عارف ان كان صح او غلط

بس هو اخد كذا فكرة عني و اداني كام نصيحة اخوية في الاخر خارج نطاق المقابلة

بس انا مستبشر خير و متفائل ان مير الموارد البشرية هناك شخصية جميلة جدا و شدتني قوي و عنده حسن استماع بشكل فظيع
و بيسأل شوية اسئلة جامده انا حاسس ان احنا هنبقي اصحاب

قال ان فيه ماتشات بنج و كورة الفترة الجاية .. هوريه بقي اللعب عامل ازاي علي اصوله ..

بس الحمد لله اني قربت اوصل لمرحلة كويسة جدا في حياتي الجديدة

معايا كل حاجتي اللي تساعدني اني احاول استفيد بوقتي هنا في القاهرة

بس في الاخر اقول علي شوية مواقف بجد انا كنت حاسس اني هعيط بجد من المشاعر الرائعة اللي خلتني احس بيها باخوة و صداقة و اخلاص :
صاحبي و زميلي احمد عزوز قام اتصل بالناس كلها و انا رايح للمقابلة اول مرة في السكة و انا قلقان قوي و اعصابي تعبت اني اتأخرت ساعة علي الميعاد .. علشان يتصلوا يشجعوني

لقيت و انا في الميكروباص قبل المقابلة بنص ساعة تقريبا و انا في اول اكتوبر

اسلام سكر بيتصل بي من اسكندرية بيطمن عليّ و يشجعني و يسخن في ّ .. ياااه ربنا يكرمك يا اسلام بجد و بحبك في الله ووحشني

ابراهيم تاج الدين بيتصل من كفر الشيخ يرفع معنوياتي وانت قدها و قدود و الثقة في النفس هي كل حاجة ..الف مليون شكر ياهيمة زي ما قلت الثقة بالنفس هي كل حاجة .. و بجد الف شكر علي الاتصال في وقت زي ده و خصوصا انها كانت اخر دقيقة معاك لان الاتصال اتقطع قبل ما يخلص كلامه .. بحبك في الله ياهيمة

عبد الله خيري .. خليك هادي خالص يا انس و اطمن و ان شاء الله ربنا يوفقك .. الف شكر يا عبد الله علي الاتصال بجد ربنا يكرمك و يوفقك في حياتك و يارب زيك و اقدر اصرف علي نفسك

و رشاد كلمته قبل ما ادخل بدقيقة واحدة المقابلة و هو في المواصلات ... الف شكر
و غنيم كلمته قبل ما اسافر و انا في الميكروباص قبل ما اطلع
و السيد حماد .. شوية نصايح فاكرها لغاية دلوقتي .. مش هقدر اقول انها كلها طلعت صح و كانت مفيدة جدا رغم اني ما قدرتش انفذ الجزء الخاص بالرغي و الكلام .. مسكت نفسي بالعافية ... الف شكر يا سيد بحبك في الله .. و بحب نصايحك دايما اللي علطول بتفيدني في حياتي

انا كنت مبسوط قوي بكل التليفونات و بكل نصايح زمايلي اللي رفعت معنوياتي قبل المقابلة بشكل فظيع

و ماكنتش حاسس اني لوحدي في المقابلة كنت حاسس انكم كلكم معايا بتمتحنوا معايا ..

و الف شكر للناس اللي كانت بتساعدني بالليل قبل ما اسافر

شكرا ليكم كلكم اثبتم لي انكم اصحاب و زمايل لالالالا اخوات اخوات بجد

و بحبكم كلكم في الله من كل قلبي

و يارب ربنا يوفقكم في حياتكم كلكم

موقف تاني ليلة ما انا مسافر : دكتور ايمن البدري في مكتبة البدري جنب البيت كنت رايح اطبع السي في

نصحني شوية نصايح ممتازة قوي بجد افادتني قوي .. رغم انه كان مشغول ساعتها .. بس بكل اخلاص نصحني و شجعني جامد ساعتها
بجد جار مخلص .. رغم فرق السن لانه دكتور في الجامعة بس ساعدني و شجعني ليلة سفري لاول مقابلة بشكل جامد .. الف شكر يا دكتور

و اخر موقف : دكتورة اماني الجمل لما اتصلت بيها و انا مروح و مبسوط ان ربنا سهلها لي في اول مقابلة
قلت لها اتبسطت قوي و انا اتبسطت اكتر انها اتبسطت بينا احنا طلبتها
بجد كنت مبسوط قوي

و ساعتها افتكرت كلمة استاذة رانيا .. ارفع رأسنا .. جه في بالي ان المهندسين في الشركة من المنصورة رفعوا راسنا و شغالين حلو بس فيه كام طالب او خريج من نوعية في الشركة ؟ ؟؟ حتي الان لم اقابل

بجد انا كنت فخور ساعتها و عندي اصرار و عزيمة اني ابقي احسن واحد في الشركة و ارفع راسكم كلكم

و والدة محمد صاحبي و استاذة رانيا لما بطمنهم كانوا مبسوطين قوي ..

ما اقدرشي اقول غير ان حب الناس بجد ده هبة و نعمة كبيرة من ربنا .. حافظ عليها .. و احمد و اشكر ربنا عليها

يارب اي حد يستفيد بالتدوينة .. و اكون حاولت اوفي زمايلي حقهم في الشكر لجمايلهم عليّ الفترة ده

دعواتكم ربنا يسهل لي في بقية الصعوبات و شدوا حيلكم اقصي ما يمكن تستفيدوا كل ما يكمن الفترة الجاية