رحلة مع دكتور شريف عرفة

افتح الفايرفوكس فيفتح امامي كالعادة جوجل افكر في شيء لم ابحث عنه و لابد ان ابحث عنه .. اه تذكرت انه دكتور شريف عرفة ..

بقولكم ايه بما اننا كنا في المريخ و لسه جداد علي كوكب الارض مش بقالنا غير سنة فهكتب بالعامية شويتين اوكي ؟ هع يلا بينا

ايون دكتور شريف عرفة اللي صاحبي عمر سعد شغال بقاله اسبوعين يكلمني عنه و مستضيفه في ندوة بالمنصورة .. عمر صديقي و صديق صديقي الصدوق احمد مجدي .. يكلمني عن فكرته باستضافة دكتور شريف عرفة و الندوة عن تنظيم الاهداف و و و عقلي يضع علامة استفهام كبيرة امام هذا الاسم ... اساله من هو شريف عرفة فيرد باجابة طويلة تشوقني للبحث فعلا عن هذا الرجل الذي يحبه عمر و يمدحه كثيرا و كثيرا

اتذكر الاسم ... اراه كتوقيع علي كريكاتير هنا او هناك او علي الفيسبوك .. يبدو انه رسام كاريكاتير

اكتب اسمه في جوجل ليخرج لي اول نتيجة بحث في موسوعة الويكيبيديا يبدوا انه مشهور ليكتب عنه هناك

اجد صفحتين بالويكيبيديا صفحة عن شريف عرفة المخرج و صفحة عن دكتورنا المنشود .. ادخل فأقرا لاعرف المزيد عنه و يزداد

صفحة التوضيح بالويكيبديا العربي - - صفحة دكتور شريف عرفة علي الويكيبيديا

اندهاشي و فضولي لهذا الدكتور اكثر فأكثر .. اصل لموقعه http://www.drsherif.net

اتذكر الموقع لقد دخلت الموقع منذ عدة ايام حين وجدت رابط لاحدي مقالاته علي الفيسبوك

اكمل بحثي و انا اتذكر كلمات دكتور شريف عرفة و طريقة حديثه في مكتبة عرابي بالمهندسين في صالون الجذب مع محمد زكريا و اول مرة اشاهده وجها لوجه و استمع اليه ...

اترك موقعه قليلا لاعود لجوجل لاري باقي نتائج البحث عنه لأصل لمقالة للدكتور احمد خالد توفيق عنه رائع جداا


و اصل لفيديوهات له علي اليوتيوب جميلة جدا لعدة لقاءات تليفزيونية معه جميلة جداا

اكمل بحثي سريعا و أحاول النوم لانه لدي يوم حافل يوم الخميس أول شهر يوليو و سأقابل الدكتور شخصيا غدا ..

بعد كل ما قراته عنه و شاهدته له و كل رسوماته الكاريكاتيرية الرائعة التي شاهدتها له انام محاولا ان اتخيل ذلك الشخص و طريقة حديثه و كلامه من الاخر بحاول اعمل حاجة غلط اوعي حد يعملها بحاول اكون صورة عنه قبل لما اقابله :D

رحت الشغل فتحت الجهاز و قفلته و قلت لهم انا مسافر عندي محاضرة لدكتور شريف عرفة .. للمرة التانية هند زميلتي بالشركة نفس الكلام و اكتر و باندهاش و سعادة بالغة دكتوووور شريف عرفة فعلا ؟ يا بختك ياعم ... قالت لي نفس الكلام قبل لما اروح صالون الجذب و اقابل دكتور شريف يومها و كلامها شجعني اروح اشوف مين دكتور شريف عرفة اللي يستحق الكلام الجميل ده كله .. “ علي فكرة هيعجبك جدا و هتعجبك شخصيته جدا جدا يا أنس ... انا متأكدة يا بختك فعلا ... احنا كنا عملنا معاه حوار في مجلة انسان مشروع تخرجنا من الكلية في 2009 ... و انسان فعلا اكثر من رائع “ هند عادل

لا بقي ... انا كده بدأت استعجل الدقايق الباقية اني اقابله ...

بكل فضول و شوق و لهفة نسيت كل مشاكل الشغل اللي كنت فيها يومها و مشيت قصدي طرت حوالين مكتبي مستني الدكتور يتصل ...

اتصل الدكتور بي علشان نسافر سوا للمنصورة .. يا بختي يا عم يا بختي ياعم ...

الو ازيك يا أنس .. انت عارف الطريق للمنصورة ؟ احم احم .. اه طبعا عارف نركب السوبر جيت ولا بيجو ؟ ولا ميكروباص

اوبس ده الدكتور باين هنسافر سوا بالعربية ... اه الطريق ... طريق اسكندرية الزراعي الجميل ... تهت فيه مرتين انا و عمر مجدي زميلي في اسلام اون لاين من كام شهر و احنا مروحين بالعربية بتاعت عمرو من ستة اكتوبر

احم احم ... و الله يا دكتور انا مش عارف الطريق كويس ... بس .. اصل .. طبعا وشي ضرب الوان و قلت يا عم انس بقالك سنة كاملة بتسافر كل اسبوع علي الطريق ده يعني ما لايقل عن 34 مرة سفر او اكتر علي الطريق ده و لسه مش حفظته

اصل انا كل ما اركب السوبرجيت او اي وسيلة مواصلات اخري استرخي و اتأمل في الطريق ... :D ايون

طب الحل ايه ...

اتصلت استعين بصديق حافظ الطريق ... اداني وصفة للطريق حاولت اقولها للدكتور ...

المهم قاللي اقابلك في التحرير عند فندق هيلتون رمسيس نروح من هناك اضمن بدل ما نتوه و نتأخر

الحمد لله ...

رحت استني الدكتور ... و الوقت يعدي .. عمر كلمني لسه شوية علي الايفينت الوقت قرب ... انا كنت خايف من كده .. قلت لعمر انت مجهز خطة بديلة ابدأ بيها غير البرنامج ... احنا ممكن نتأخر لاي ظرف

فضلت واقف أتامل في العربيات اللي جايا حوالي في التحرير حاولت اقعد العربيات زهقت قعدت اتفرج علي العربيات من كل شكل و لون متوقع ان الدكتور يمكن يكون في واحده منهم في أي لحظة ..

و بناءا علي الصورة المسبقة اللي حاولت ارسمها في ذهني عنه حاولت اتوقع و اتخيل شكل عربيته أو لونها حتي ...

و اخيرا وصل و قابلته و انطلقنا علي الطريق ... ما اقولكمشي قد ايه كل توقعاتي كانت ضئيلة جدا بالنسبة لدكتور شريف عرفة فعلا

اول ما دخلت و اتكلمنا كلام عمر بيرن في دماغي “اوعي تصدع دكتور شريف عرفة “ و في سري “ ماشي يا عمر و ايه المشكلة يعني لما نتكلم ساعتين تلاتة يعني .. مش هصدعه ماشي ياعمر ... حاضر حاضر .. :D عمر طبعا لو عرف اني كنت بقول كده في سري هيقتلني طبعا

اكلمت معاه في حاجات كتيير ... و قلت له اني عملت سيرش عنه و ضحك :D ..

اكلمت معاه في شغلي في جرنان او مجلة روزاليوسف انا مش بطيق اسمع اسمها ولا اسمع اسم رئيس التحرير ولا بشتريها ولا بدخل موقعها ...

قاللي شوفت شغلي ؟ قلت له اه قاللي رايك ايه ؟ قلت اكتر من ممتاز جدا .. قاللي خلاص ..

روز اليوسف في حد ذاتها مدرسة كاريكاتير عريقة و كان فيها عمالقة الفن ده و كانت اول مجلة او جرنان يهتم بالفن ده علي المستوي العربي و دكتور شريف عرفة رسام كاريكاتير

اها .. كده بدأت افهم الموضوع و احاول اتقبله و افهمه اكتر ... بالنسبة لي المجلة ده او الجرنان ده زي الزفت و حاجة صفراء ملهاش لا طعم ولا لون وليها ريحة صفرا ريحة النفاق الحكومي الممقوت و دكتور شريف عرفة انسان رائع جداا و رسام كاريكاتير رائع

كلمني دكتور شريف عرفة عن سقف الحرية لرسامين الكاريكاتير و ازاي الرسامين بيكافحوا ان رسوماتهم تتوافق انها تتنشر و انه عادة بيحصل خلاف مع رئيس التحرير و معاهم بسبب كده

افتكر كلامي علطول اللي بقوله بخصوص تعميم الصفات .. اقنعت نفسي ان مش كل اللي في روزاليوسف وحشين و لا كل اللي في الدستور حلوين :D

اه نسيت كان مع الدكتور شريف اخو زوجته استاذ وائل الحامولي ... انسان لذيذ جدا الحديث معه شارك معانا في الحوار استفدت منه كثيرا في عدة جزئيات

كنا بنتكلم في نقطة ان فيه ناس مش بتقدر ان الواحد مشغول و مطحون في الشغل و دوامة الحياة وخداه شوية و طموحاته و و وقته بالعافية بيكفي انه ينام و الناس تقولك اصله مش بيتصل لانه كبر علينا ... الدنيا وخداه مننا اصله نسانا و الخ

لخص الاجابة كلها في كام كلمة ... اللي بيقول كده اصدقائنا الفاضيين اللي مش مشغولين

علطول رديت فعلا الفاضي يعمل قاضي ...

علطول افتكرت كلامي عن كوكب الأرض و كوكب المريخ ايام الجامعة ... لما كنا هناك في المريخ في جامعتنا كنا بنشوف بعض كل يوم بنتصل ببعض كل يوم تلات مرات اول لما نصحي و احنا نازلين الجامعة و قبل لما ننام و بنشوف بعض كل يوم

و لما وصلنا كوكب الارض و نزلنا الدنيا العجيبة ده و اتخرجنا و الدنيا اخدتنا في دوامتها زي كل البشر الناس المشغولين بتلتمس عذر لزمايلهم المشغولين و بدأوا يتقبلوا الوضع و انشغالهم عن بعضهم لاسبوع كامل دون تليفون من اي طرف

كل واحد بقي مشغول في حياته و مستقبله و تخصصه

اما البعض الاخر مش قادر يستوعب كده لانه نفسيا و معنويا لسه ما اتخرجشي بيعمل دراسات عليا ربما قاعد في البيت ربما شغال شغلانه سهلة ربما ... فمش قادر يتخيل ان بقية الناس مشغولة حاسس ان كل الناس فاضية زيه ...

الموضوع ده كان مضايقني قوي في الفترة اللي فاتت من كذا واحد من اصحابي و حسيت فعلا اني مقصر في حقهم و حاسس بالتفصير و بحاول اتصل بيهم كلهم و و و الخ ...

و زعلت قوي لما ناس من زمايلي و من معارفي اتهموني اني اتكبرت عليهم و نسيتهم و تعاليت عليهم و كبرت و نسيتهم و اللي اشتغل و نسي حبايبه و اصحابه

ازعل قوي لاني مش كده الايميل بتاعي مليان السي في بتاعت كل اللي اعرفهم علشان لو جت لي اي فرصة مناسبة لاي حد فيهم ببعت لهم علطول ..

انا عمري ما اتكبر علي زمايلي و اصحابي اللي اتعلمت منهم كتيير و بحاول افيدهم و كنا زمايل و اصحاب طوال اربع سنين

القعدة مع دكتور شريف عرفة في العربية طول الكام ساعة في زحمة المواصلات علي طريق بنها للمنصورة ... كانت اكثر من رائعة

عرفت من قريب مين هو دكتور شريف فعلا ..

هو مش سوبر مان ... زي ما الناس بتحسب بتوع التنمية البشرية سوبر مان لا خالص

دكتور شريف عرفة انسان مش سبوبر

رغم ان ده تاني مرة اقابله في حياتي اول مرة كانت في مكتبة عرابي لما عمر عرفني عليه و قاله اني ممكن اسافر معاه

حسيت اني اعرفه من سنين

دكتور شريف عرفة انسان ناجح

صعب قوي تقتنع بكلام واحد عن النجاح و هو لم ينجح في تخصصه او في حياته او او او بيكون الكلام مش مقنع لانه مش طبقه قبل لما يقوله للناس تطبقه ... من كلام دكتور شريف و بالبحث عن الانترنت و بمشاهدة أعماله تحس قد ايه دكتور شريف انسان ناجح

دكتور اسنان و ده لوحدها مهنة تخليك مشغول جدا علطول اليوم اما عيادة اما ابحاث و دراسات لان اصحابي دكاترة اسنان و مشغولين علطول

رسام كاريكاتير و ده مهنة محتاجه ذهن رايق و مهارات و تفرغ و ابداع

مدرب تنمية ذاتية -بشرية - و كاتب و مؤلف ؟ ايون ده بقي في حد ذاتها محتاجه مجهود فظيع جدا من الاطلاع و القراءة و المطالعة و برمجة لغوية عصبية و علم نفس و علوم ادارة و مهارات و قراءات و ممارسة و تطبيق لكل ده الأول و محتاجه قدرة علي التأليف و الكتابة للناس أول بأول علي موقعه و موقع بص و طل

طبعا سالت لدكتور شريف السؤال ده اول لما اكلمنا في العربية ... ازاي قدرت تجمع بين كل ده ؟

طبعا انا عرفت اجابة السؤال قبل لما أسأله بتنظيم الوقت

انا سالت سؤال مختلف شوية .. هل بتدخل الحاجات في بعض ... يعني مثلا نقدر نتخيل في مكتبه في العيادة كشكول رسم علشان الكاريكاتير او الشهادات اللي حصل عليها في التنمية البشرية او العكس و هو في المجلة بيكشف علي اسنان زمايله مثلا رسامين الكاريكاتير التانيين ؟؟ !!

سؤال غريب صح ؟ اصل في ناس بتعمل كده فعلا .. و بدون ذكر أسماء ...

اجابته قاطعة قاللي لأ ... ما ينفعشي طبعا

وصلنا المحاضرة متأخرين .. و الناس كانت قلقت جامد بس عمر عمل حركة ممتازة .. اتصلت بدكتور شريف و حط الميكروفون علي الموبايل و اعتذرنا للناس علي التأخر .. حركة عبقرية من شخص عبقري زي عمر ... الناس اطمنت فعلا و استنت شوية

المحاضرة كانت جميلة جدا

لينك لصور المحاضرة

مع دكتور شريف عرفة

أحاول افتكر لكم العناصر اللي اتكلمنا فيها تقريبا علي قد ما أقدر

العناصر اللي كانت مكتوبة في البوستر :

ماهو الهدف من حياتنا ؟

كيف نعرف و نحدد أهدافنا ؟

الفراغ و كيفية استغلاله

تطوير مهارة التفكير الايجابي

معرفة مصادر الثقة بالنفس

ماسر نجاح بعض الموهوبين أكتر من غيرهم

اكتشاف الموهبة

ماهو قانون الجذب العام ؟

كيف ترفع روحك المعنوية ؟

و ده الي اتكلم فيه دكتور شريف عرفة و أكتر ... للأسف كنت مرهق جدا من السفر ... ربنا يعين دكتور شريف مش عارف بجد ازاي عرف يشرح المحاضرة المتميزة ده ... ده انا ماكنتش عارف اركز خالص ...

بس بعد البريك قلت لنفسي انا مش منظم انا زيي زي الباقيين احاول اقعد و أستفيد

كتبت شوية ملاحظات في كشكول صغنون كان معايا شوية شخابيط سريعة

“ ركز و عيش اللحظة “

قال ملحوظة مهمة قوي : لابد من الامتلاك للاحساس بالعطاء ...

ساعتها افتكرت حاجة ... فيه ناس تحب تساعدك و تتبرع بحاجات غيرها فده مش بيحس بطعم العطاء ولا العطاء نفسه اساسا

و أخدنا قاعدة سمارت SMART

S = Specific

M = Measurable

A = Ambitious

R = Realistic

T = Timed

و اجمل رسمة أخدناها في اليوم كله

حدد الهدف > إجمع المعلومات > مساعدة الناس > وضع خطة > تنفيذ الخطة > النتيجة > ...

و كان فيه سؤال ممتاز قوي من حد كان بيسأل اللي فهمته من السؤال يعني لو هو في شغل و جاله شغل تاني ازاي يختار يروح اي واحد

كان رد دكتور شريف رائع جدا .. يمكن تبحثوا اكتر عن الموضوع ده علي جوجل هتلاقوا حاجات كتيير .. اخصائيين الموارد البشرية عارفينه باسم job offer checklist دكتور شريف شرحها بشكل سهل جديد و سريع و مبسط كعادته :D

يعني بتحدد اهم معايير بالنسبة لك تقييم علي اساسها الشغلانتين و تحط درجة في الماية لكل معيار و تجمع و اللي يطلع اكتر يكسب

ترسم جدول فيه عمودين و كل عمود بيمثل شغل او وظيفة و علي اليمين او الشمال المعايير

هم مش هيزيدوا في اكتر الحالات عن عشر معايير

المرتب , الوظيفة , بيئة العمل , الأجازات , ثقافة الشركة , مستقبل الشركة , التامينات و المعاش , عدد ساعات العمل و الاوفر تايم , ... الخ

انا عمري ما هنسي اخر ايامي في اسلام اون لاين لما دخلت علي م.ناجي و قلت له ازاي اختار بين اسلام اون لاين و بين شغلي الجديد في أفق فول تايم و انه قاللي علي الطريقة الممتازة ده

في اخر المحاضرة دكتور شريف عرفة وصل لاهم نقطة كل واحد يطلع يقول أهدافه و هو في أي مرحلة حقق ايه و لسه ايه و ناوي يحققها ازاي

و فجأة دكتور شريف بعد ما قال كده ... عمل حاجة غريبة علينا اختار كرسي وسط الناس و قعد و طلب الناس تقوم تكلم .. مش بقولك انا احبيت الراجل ده بجد تواضع ممتاز قوي حاسس انه بيقولي بدون ما يتكلم لما تبقي ناجح او تبقي معروف او تبقي مشهور اوعي تبقي متكبر او مغرور و المحاضر الناجح يدي فرصة الناس تكلم و يسمع لكلام الناس بانصات و ده اللي عمله و حاول يناقش الناس في أفكارها و أحلامها

فكرت اطلع اتكلم .. بعض المستمعين طلعوا اتكلموا كلام جميل جدا

طلع صديقنا بسام حبيب قلبي صاحب مدونة أنا الريس طلع يتكلم .. كنت مبسوط جدا انه حضر الايفينت علشان هيفيده قوي

و في الاخر طلعت اتكلمت ...

كانت لحظات عمري ما هنساها و انا واقف احكي حلمي و افكاري ... قدام الناس و اني بدأت فعلا بالتنفيذ ...

و لما الايفينت خلص لقيت واحدة من الحاضرات بتقولي انت اكتر واحد في الناس اللي اتكلمت قلت كلام عملي او اهداف سهلة التنفيذ ... قلت لها علطول لاني طولت حبتين في مرحلة جمع المعلومات حولين اهدافي اللي احترت كتيير فيها و شكرتها و مشيت

عمري ما هنسي ابدا اللي حصل يومها

عموما نصيحة اقرأوا كتب دكتور شريف عرفة و انتم تعرفوا حاجات كتيير قوي

اللي حمسني اكتر التدوينة ده غير وعدي لدكتور شريف اني هكتبها و استأذنته اني اكتبها و قاللي انه مستنيها

اني لسه مخلص كتابه حالا : كتاب لماذا من حولك أغبياء اصلي بقالي كام يوم حاسس ان كل اللي حوالي أغبياء خالص و انا مش فاهمهم و هم مش فاهمني

الكتاب اكثر من رائع فعلا ... اسلوب سهل و سلس و سريع و مبسط لكلام مكتوب في كتب بطريقة مقعدة علمية بترجمات حرفية او بكلام قصصي بحث بحيث ما تعرفشي توصل للخلاصة بسهولة

الكتاب شيق بحيث خلصته كله علي بعضه في قعدة واحدة

انا فاكر اني لما سبت الدكتور شريف بعد الايفينت ووصلت بيتنا بعد يوم جميل جدا و طويل قوي رغم اني كنت تعبان قوي و ميت من الجوع و الارهاق و زهقان من اي كومبيتر او نت او خلافه

فتحت اقرب كمبيوتر لي و فتحت موقع دكتور شريف تقريبا قريت غالبية المقالات و انا قاعد قدام الكمبيوتر بحاول أفتح عيني بالعافية


بجد مليون شكر يا عمر علي الندوة الجميلة و انك عرفتني علي دكتور شريف عرفة الانسان الرائع


و شكرا دكتور شريف علي الرحلة معك كانت رحلة ممتعة و شيقة اتمني ان اراك باحسن حال و نكرر تلك الرحلة

____________________

• الموقع الرسمي للدكتور شريف عرفة
• مقال د. أحمد خالد توفيق عن شريف عرفة
• د. شريف عرفة يحلل نجاح د. نبيل فاروق
• القسم الخاص ب د. شريف عرفة على موقع روايتي